阿根廷傳媒報道,西維爾喺周四(6日)凌晨歐聯主場對多蒙特,將會係教練盧比迪古嘅告別戰,因為西維爾已經同森柏奧利達成協議,將會喺今場歐聯後落實。盧比迪古亦唔愁冇班落,消息指狼隊將會向佢開出合約。

西維爾今季成績差勁,西甲頭7輪只係贏過1場,捲入護級漩渦,球會總監蒙奇早就想更換教練,近日終於同阿根廷名帥森柏奧利傾掂數,不過為免影響對多蒙特嘅備戰,將會畀盧比迪古教埋今場。

56歲嘅盧比迪古執教西維爾3年,2020年贏得歐霸盃冠軍,奪冠過程中曾喺8強擊敗狼隊,呢支英超球隊早前炒般盧拿治後,已將盧比迪古列為新帥目標之一,今次佢畀西維爾炒魷,狼隊就可以冷手執個熱煎堆。

© Copyright 2024 GAMEONE官方現金網娛樂城 - 新會員註冊入$1000送$1000
Powered by WordPress | Mercury Theme